يعني ايه صحافة رخيصـة؟

في برنامج تلفزيوني الممثلة بسمة اتسألت عن ايه اللي اتغير في حياتها بعد ولادة بنتها واتطلب منها تحكي تجربتها "الشخصية" عن الحمل والولادة..

بسمة قررت تتكلم بصراحة وقالت انها مرت بإكتئاب ما بعد الولادة وحكت ازاي ده كان مأثر عليها.
واختصرت معاناة بتعدي بيها ستات كتير بعد الولادة وقالت "أنا عرفت من أول لحظة اني حبيتها.. بس ما كنتش عارفه أتعامل معاها أول يومين." والمذيعة نفسها كملتلها الجملة كإحساس متعارف عليه وبتفكر فيه كتير من الأمهات.

وعن تجربة الولادة نفسها بسمة حكت انها اتغيرت كتير وقالت بالنص:

" قبل الولادة كانت واخده قرار بأني مش هرضّع طبيعي وشايفه اني مش هاخد دور البقـرة في حياة حد؛ بس انتهيت اني رضعّت سنتين طبيعي.. أول ما الموضوع مشي وبقى بيننا bond (رابطة) قعدت أرضع سنتين كاملين on demad (كل ما تطلب) مش كل ٣ ساعات ولا كل ٦ ساعات، لأ كل ما هي تبقى عايزه.

قبل الولادة كنت واخده قرار أن مفيش عيل هينام جمبي أنا بتقلب ونومي تقيل ومش عايزه ده.. وجبت السرير وكنت ناويه من أول يوم أنها تنام عليه.. كنت متخيله أن أنا هبقى كده وكانت دي قناعاتي؛ اكتشفت ان كل ده ولا أي حاجه.. أنا فضلت أنا وبنتي سنين ننام جمب بعض."

كل الكلام المهم اللي فوق ده تم اقتطاعه من سياقه ونشر مانشيتات رخيصة عن الممثلة اللي بتقول أن الرضاعة دور "البقـر". عشان مش مهم الكلام صح ولا غلط ولا تأثيره ايه المهم حاجه تخلي الناس تهتم.

بدل ما تكون الحلقة فرصة للصحافة عشان توعي الناس عن اكتئاب ما بعد الولادة والصعوبات اللي بتمر بيها الستات بسبب الحمل والولادة وتغير جسمها وشكل حياتها، الكلام اتحور وبقى تريقة وشتيمة وهجوم على إنسانة طلعت فتحت قلبها وحكت عن تجربتها الشخصية والأحاسيس اللي مرت بيها خلال ولادتها وتربيتها لبنتها.

اللي بيحصل مع بسمة عيب؛ واكتئاب الولادة شيء حقيقي.