Welcoem to posts!!
in the future - u will be able to do some more stuff here,,,!! like pat catgirl- i mean um yeah... for now u can only see others's posts :c
هل ديه دعوة للسلبية ؟!! 🤔
في الحقيقة أنا مش شايفها كده ... أنا شايفها أكتر دعوة للتوازن ⚖️
ماشي ضروري إن الواحد يكون متفائل بالخير دائما ... لكن مينفعش تلبس نضارة التفاؤل طول الوقت لدرجة إنك متبقاش شايف عيوبك ومشكلاتك، لأنك لو مشوفتهمش يبقى مش هتعالجهم وده معناه إنك هتفضل غارق فيهم وتفضل ترمي كل لومك على الحياة والظروف
ممكن أكون أنا شوفت معنى الكلام ده كده ... وممكن تتفق معايا أو تختلف بس في الحالتين يسعدني أعرف رأيك في التعليقات 😉📝
*الاقتباس من كتاب 📖 : فن اللامبالاة - مارك مانسون
2 - 0
هل تتفق مع جملة "مارك مانسون" اللي في الصورة ديه 👇🏼 ... إن في جزء من المعاناة في الحياة لا يمكن تجنبه ؟!!
ولو تتفق معاه هل شايف إن ده نوع من السلبية أو السوداوية ... أكيد هينط في دماغك دلوقتي تعبير "يا عم أبوس إيدك ارحمنا هي نقصاك أنت ومانسون بتاعك ده 😅"
بس تعالى أكملك حته كمان من الكتاب وشوف معايا هو الموضوع سلبي فعلا ولا إيه
" عندما تكف عن الانزعاج من مختلف أنواع المساوئ التي ترميك الحياة بها (سوف ترميك بها دائما صدقني)، فإنك تصير شخصا منيعا تجاهها من غير أن تبذل في ذلك جهدا كبيرا ... ففي نهاية المطاف، تظل الطريقة الوحيدة للتغلب على الألم هي أن تتعلم أولاً كيف تتحمل ذلك الألم " ... انتهى الاقتباس
في الحقيقة لو أخدت بالك فهتلاقي إن الكاتب أتفق في جملته مع معنى الآية الكريمة { لَقَدۡ خَلَقۡنَا ٱلۡإِنسَـٰنَ فِی كَبَدٍ } [سُورَةُ البَلَدِ: ٤]
وهي إن ديه طبيعة الحياة العناء والمشقة جزء لا ينفصل عنها وإن من يعتقد بغير ذلك فهو واهم ،، وبالتالي تقبل هذه الحقيقة بيخليك تتعامل معاها وتتخطاها ومتفضلش طول عمرك عايش في وهم إنك بتسعى للتخلص من التعب في الحياة ... حتى وصولك لهدف معين في حياتك أه معناه إنك هتتخلص من تعب قديم إلا إنه هيرافقه تعب جديد (بس الإيجابي في الموضوع إن فيه تعب أحسن من غيره فأنت وشطارتك بقى 😉)
يعني من الأخر الموضوع هيبقى عامل زي ما تكون قررت تشرب أي حاجة بدون سكر ... ممكن في البداية تحس إن كل حاجة مرة لكن مع تقبلك للوضع هترجع تحس بالطعم الحقيقي للحياة .. قصدي طعم المشروب يا أخي 😁
1 - 0
قراءاتي الحالية 🤓 📚
📖 السابق: سر اختيار الأسهم لتحقيق مكاسب فورية وكبيرة
تأليف لاري ويليمز / ترجمة محمد البرماوي
الكتاب أنا استمتعت بيه جدا خاصة إنه من ترجمة أستاذنا المبدع "محمد البرماوي" وبالتالي أنت بتقرأ كتاب مفيد من الناحية الفنية بأسلوب ترجمة ممتع وشيق ... وأكتر حاجة عجبتني في الكتاب مش بس الأساليب الفنية اللي المؤلف اتكلم عنها، ولكن كمان اللي ما وراء الفكرة نفسها (إزاي شاف المشكلة وفكر في حلها وإنعكاسها على تداولاته)
🌟 تقييمي: كتاب أرشحه طبعا بكل ثقة لكل المهتمين بالتحليل الفني وتداولات الأسهم 👌🏼
-------
📖 الحالي: فن اللامبالاة
تأليف مارك مانسون
الكتاب مازلت في بدايته ولكنه قدر يلفت إنتباهي لأنه بيعالج مشكلة أنا بعاني منها وهي ال Overthinking 🤯
🌟 تقييمي: بعد ما أخلصه بقى إن شاء الله 😁
-------
وأنتوا كمان قولولي في التعليقات 📝 آراءكم في الكتب ديه لو قرأتوها ... وأدوني اقتراحات للقراءات الجاية بإذن الله 🧐
2 - 0
نقدر نقول إن بوست النهارده بعنوان خواطر دولارية 😅
في يوم 19 مايو قام البنك المركزي المصري برفع سعر الفائدة بمقدار 2% وده كان لسببين أولا لكبح جماح التضخم اللي وصل لحدود الـ 13% وثانيا لجذب الأموال الساخنة وبالتالي ده يدي قوة للجنيه أمام الدولار .... وعلى الرغم من إن المعطيات ديه المفروض (نظريا) تضغط على الدولار وترفع قيمة الجنيه إلا إننا على العكس من ده لاقينا الأسبوع اللي فات حصل انخفاض جديد في قيمة الجنيه مقابل الدولار 🤷♂️ واللي كان في حدود 40 قرش لتكون أكبر وتيرة انخفاض منذ تخفيض قيمة العملة في مارس؛ وده أكيد ليه أثر سلبي على تكاليف الإنتاج وبالتالي بيخلينا نشوف ارتفاع في أسعار السلع ... بس بما إن ده هو الأمر الواقع حاليا فده أثار عندي سؤال مهم.
<< هل إحنا محتاجين سعر جنيه قوي 🤔🤔 ؟؟ >>
بس قبل ما نجاوب على السؤال ده خلونا نبص على التجربة الروسية خلال الفترة اللي فاتت فعلى الرغم من الضغوط الاقتصادية على روسيا بسبب عقوبات الحرب واللي كان أثرها في البداية هو انخفاض قوي في قيمة الروبل الروسي أمام الدولار الأمريكي إلا إن بعد أيام عادت القوة للروبل مرة تانية وقدر يعوض خسايره بل كمان قدر يحقق مستويات سعرية جديدة مرتفعا أمام الدولار ... وهنا نقول لنفسنا حلو طيب ليه منعملش زيهم ؟!!
بس الإجابة مش محتاجة تفكير كتير ... روسيا عندها الصادرات اللي عارفة إن أوروبا متقدرش تستغنى عنها (وهي الطاقة زي الغاز الطبيعي) وعشان كده طلعت قرارها بإنها مش هتقوم بتصدير الغاز إلا بعد دفع ثمنه بالروبل الروسي ... واللي بالفعل قبلت بيه أوروبا ورجع الطلب على الروبل مرة تانية وبالتالي ارتفعت قيمته.
طيب هل إحنا زي روسيا ؟!! بالطبع لأ ... للأسف إحنا بنية صادراتنا ضعيفة جدا وهتلاقيها دايما مقتصرة على الخضار والفواكه أو المواد الأولية أو المنتجات غير مكتملة الصنع اللي لسه هتخش في عملية إنتاجية، وحتى المنتجات المكتملة هتلاقيها من السهل يتم استبدالها من دول تانية.
طيب الكلام ده كله بتلقائية كده جاب في دماغي التجربة الصينية وإزاي هي بتكافح دايما لإبقاء عملتها رخيصة مقابل العملات الأخرى وده طبعا أكسبها ميزة تنافسية هامة جدا وهي السعر ده بالإضافة طبعا للجودة اللي بتكون على حسب رغبات العميل وإمكانياته ... وطبعا كان نتيجة لده هو اجتياح المنتجات الصينية للعالم كله واللي تبعه تطور ثم تطور ثم تطور في الصناعة عندهم.
دلوقتي بقى نرجع للسؤال الي سألناه في الأول ... هل إحنا محتاجين سعر جنيه قوي؟؟
بص فيه عندنا مثل بيقول (( إن جالك الغصب أعمله بجميلة )) ... وبما إن وضعنا الاقتصادي الحالي بيفرض علينا سعر الجنيه القليل مقارنة بالعملات التانية وأه ده بيكوينا بنار الغلاء بس بما إننا مجبورين على الوضع ده في الوقت الحالي فليه منستغلوش لصالحنا ... سعر العملة القليل ليه ميزة وهو إنه بيدي لصادراتك ميزة السعر التنافسي ولكن ده مش هيحصل إلا لو كانت صادراتك ليها قيمة حقيقية وجودة تنافس مش لازم تبقى أحسن حاجة ولكن يكفي إنها تكون بجودة كويسة.
وبالتالي إحنا محتاجين كام حاجة كده:
- إعادة هيكلة للمنظومة الصناعية في مصر.
- دعم البدائل المحلية والرفع من جودتها.
- التركيز على الصناعات التي لدينا فيها ميزة تنافسية في التصدير.
- التدريب ورفع كفاءة العمالة، وكذلك الاهتمام بالتعليم الفني والمهني.
- دعم الصناعات الحرفية واليدوية التي تلقى رواج تصديري.
- وكمان مهم إننا ندي حرية أكبر لسعر الصرف عشان يكون معبر جيد عن حالتنا الاقتصادية ويساعدنا في تقييد وارداتنا وزيادة صادراتنا بدل ما نفضل بندعمه وكل سنتين تلاتة يعمل القفزات السلبية اللي بنشوفها ديه.
أنا عارف إن يمكن بوست النهارده مرتبط أكتر بالجهود على مستوى الدولة ومش مرتبط بينا بشكل مباشر ولكن ضروري برده إننا نكون فاهمين إن الوضع السلبي اللي إحنا فيه ده نقدر نحوله لميزة ... ومع ذلك برده أنا منستش إننا نحاول نشوف حل للوضع المعيشي الصعب اللي إحنا فيه حاليا وعشان كده في خلال أيام هينزل إن شاء الله على قناة مشبك ورق فيديو جديد يساعدنا على تخطي الوضع المالي الصعب اللي إحنا فيه ده ... فمتنسوش تعملوا اشتراك في القناة وتفعلوا الجرس عشان يجيلكوا إشعار بمجرد نزول الحلقة إن شاء الله
3 - 1
بسبب الظروف اللي إحنا فيها خلال الفترة الحالية جالي أكتر من مرة السؤال بتاع "هل نشتري دهب دلوقتي ؟!!"
وعلى عكس الفترة اللي فاتت (قبل الحرب الروسية الأوكرانية وبعدها مباشرة) واللي كنت بنصح فيها بشراء الذهب كتحوط ومضاربة؛ إلا إن الوضع حاليا تغير وقبل ما نجاوب على سؤال طيب هل نشتري دهب دلوقتي ولا لأ ... تعالوا نعرف كام نقطة كده.
أول حاجة لازم نعرفها هو سعر الدهب عندنا في مصر بيتحدد إزاي ؟!!
سعر الدهب محليا بيتأثر بـ 3 حاجات هي اللي بتحرك سعره:
1. سعر الذهب العالمي.
2. سعر الجنيه مقابل الدولار.
3. العرض والطلب المحلي.
طيب تعالوا ناخد كل واحدة فيهم ونشوف إيه وضعها في الوقت الحالي
◀️ أولا: سعر الذهب العالمي:
**تفصيلة فنية تقدر تتخطاها وتقرأ المختصر لو مش عايز تدوش نفسك
السعر العالمي حاليا بيتداول أعلى 1800 دولار للأوقية والمستوى ده يعتبر دعم وبيتزامن كمان مع خط اتجاه صاعد على المدى الأسبوعي يعني المنطقة الحالية هي منطقة طلب، ده في الوقت اللي بيفصلنا شوية وقت عن الاجتماع القادم للفيدرالي الأمريكي ... وبالتالي فالفترة القادمة ممكن نشهد بعض الارتفاع كتصحيح لمستويات 1835 ثم 1850 و 1870 كمان، ولكن ده صعود مؤقت وبعدها مرجح عودة الأسعار للهبوط ليستهدف الدعم الرئيسي 1760
طيب فالمختصر إن السعر العالمي للذهب مازال هابط بشكل عام ولكن الأيام القادمة قد يشهد بعض الارتفاع، ولكن الارتفاع ده مش فرصة للشراء ولكنه فرصة للبيع بسعر أعلى ... إذن فالسعر العالمي يميل للهبوط.
---
◀️ ثانيا: سعر الجنية مقابل الدولار:
الأيام اللي فاتت شهدنا تخفيض لقيمة الجنيه نتيجة إنه كان مقيم بأعلى من سعره الحقيقي ... ودون الدخول في تفاصيل معقدة فبعد كام يوم وبالتحديد يوم الخميس القادم ففيه اجتماع للجنة السياسة النقدية في البنك المركزي المصري واللي متوقع فيها إن يتم رفع قيمة الفايدة بنسبة من 1% إلى 2% لكبح جماح التضخم نتيجة الأحداث العالمية.
الارتفاع ده قد ينتج عنه انخفاض حتى لو طفيف في أسعار الدولار ... وبالتالي ده هيقلل من أسعار الدهب المحلية.
---
◀️ ثالثا: العرض والطلب المحلي:
لازم نعرف إن بسبب تخفيض قيمة الجنيه الفترة اللي فاتت وزيادة الطلب على الدهب محليا كحفظ لقيمة المدخرات ... ده رفع عندنا أسعار الدهب في مصر لدرجة إنه بقى أعلى من السعر العالمي كمان بأكتر من 200 جنيه للجرام (ولو ضيفنا الضريبة والدمغة والمصنعية فالفرق هيكبر كمان) ... الارتفاع ده أدى لإيه بقى:
- ناس من اللي كانت شارية دهب في الشهور اللي فاتت حققت مكسب كبير وبالتالي بعضهم توجه للبيع (زيادة عرض)
- صدور تقرير من شعبة الذهب يفيد بإن بعض التجار استغلوا ارتفاع الأسعار وباعوا ذهب بأعيرة متلاعب فيها (زيادة عرض)
- تخفيض قيمة الجنيه وارتفاع تكاليف المعيشة قد يدفع البعض لبيع الدهب المدخر (زيادة عرض)
- الارتفاع الكبير والسريع في أسعار الذهب المحلية أدى للعزوف عن الشراء الجديد في المستويات الحالية (انخفاض طلب)
ومن هنا نفهم إن بدأ يبقى فيه توجه لزيادة العرض وقلة الطلب عندنا في مصر واللي بالتالي سيؤدي لانخفاض سعر الذهب محليا.
---
وبالتالي فإحنا عندنا أسعار الذهب العالمية بتميل للهبوط، وسعر الجنيه قد يشهد بعض الارتفاع، وعرض الذهب محليا بيزيد في حين إن الطلب بيقل ... وبالتالي فإجابتنا بقت واضحة وصريحة إن (( الوقت الحالي مش وقت مناسب لشراء الذهب بهدف الادخار أو التحوط ))
طيب ممكن نتوجه لإيه بدل الدهب في الوقت الحالي ؟!! ... أعتقد بقى ديه ممكن نتكلم عليها في مرة تانية إن شاء الله عشان البوست بقى طويل أوي 😅
الله المستعان
أتمنالكم التوفيق ودمتم بخير
5 - 0
أيوه ابنك يقدر يبقى (( 💰🤑 ملــــيونير 🤑💰 )) لو مكررش نفس أخطائنا ... وعشان كده لازم تهيئه وتعلمه الثقافة المالية ... وعشان تعرف تعمل ده فلازم تتفرج على الفيديو ده 👇🏼 :
https://youtu.be/pSk_BY3dI94
1 - 0
We Are BACK 🥳
النهارده راجعين ليكم في حلقة جديدة من مشبك ورق ... ومش بس ديه حلقة جديدة لأ ده موسم جديد بالكامل كمان 🤩
يعني اللي فات ده كان الموسم الأول ودلوقتي فيه موسم تاني 😲 ؟!!!
أيوووووووووون بالظبط كده ... بما إننا بقالنا فترة منزلناش حلقة وبما إننا غيرنا لوجو القناة وبما إن الحلقة نفسها كمان هيبقى شكلها جديد عن اللي فات ... فإحنا قررنا وإحنا بنكتب البوست ده إننا نسميه .... دن دن دن ... هنسمـــيييه ... هااااا .... 🥁🥁🥁🥁
.
.
⭐️⭐️ (( المـــــــــووووووووووووســـم الثــــــــــــــــــــــانــــي )) ⭐️⭐️
.
.
أول حلقة بقى في الموسم التاني ده (واخدين بالكم الموسم التاني 😉) هتبقى النهارده الساعة 07:00 مساء ... واخدين بالكم يعني بداية الموسم التاني هتبقى النهارده 👌🏼
المهم عشان منطولش عليكم فانتظرونا النهارده في الــموســ ... استنونا الساعة 7 وخلاص 😁
0 - 0
النهارده جايين ليكوا بمفاجأة جديدة 🎉🎊 ... وهي جاية تلبية لطلباتكم 😍
فبعد العديد من الأسئلة والاستفسارات عن البورصة المصرية وكيفية الاستثمار فيها،، وكمان أسئلة تانية عن المفروض نتعلم إيه عشان نكسب في البورصة ونبدأ منين وإزاي ؟!!!
مع كل الأسئلة ديه قررنا نعمل قناة على التليجرام .. وهي هتكون قناة تعليمية في المقام الأول هدفها التركيز على التحليل الفني وإدارة رأس المال والمخاطر وتطبيقاتهم على البورصة المصرية، وبالتالي هنكون بنحلل من وقت للتاني أسهم السوق ومؤشراته عشان ده يساعدنا نتعلم أكتر.
ده غير إن ديه هتكون خطوة لمفاجآت تانية جاية إن شاء الله ... بس عشان تكون متابع كل ده فأنت محتاج تتابع القناة من خلال اللينك التالي 👇🏼
++++++++++++++++++++++++
t.me/elBorsagyEGX
++++++++++++++++++++++++
2 - 0
اليومين دول بنسمع عن المصالحة بين (مصر) و (تركيا) بعد سنوات من القطيعة ... فهل المصالحة ديه مفيدة لمصر وفي صالحها ولا لأ ؟!!
عشان تفهم كل ما يدور عن المصالحة المصرية التركية خلال اليومين دول ، وتعرف هل هي الأفضل لمصر ولا لأ فلازم تشوف الفيديو اللي عملناه قبل كده واتكلمنا فيه عن مصر وتركيا وإسرائيل وصراعات الغاز في شرق المتوسط، وكمان أتكلمنا فيه عن مدى جدوى المصالحة ديه ... الفيديو من اللينك التالي 👇 :
https://youtu.be/A35FvO2VmSU
3 - 0
يا ترى إيه الرابط بين (ايلون ماسك / البيتكوين / Gamestop) ؟!!
وإزاي نستغل الحاجة ديه في إننا نكسب من أي سهم بيطلع بسرعة زي Gamestop أو غيره ... أو حتى نستغلها في إننا نكسب ونكبر البيزنس بتاعنا !!!
كل ده هتعرفه من الحلقة ديه ... لو كنت لسه متفرجتش عليها فتقدر تشوفها من اللينك ده :
https://youtu.be/a2KLKqsDBOk
5 - 0
مشبك ورق مهتمة بالثقافة المالية وهدفها إنها تساعدك تكون « ذكي وغني ماليا »