নমস্কাৰ, মোৰ নতুন চেনেলটোলৈ আপোনালোকক স্বাগতম জনাইছোঁ৷ এই চেনেলটোৰ জৰিয়তে আমাৰ অসমীয়া থলুৱা ব্যঞ্জনৰ বিষয়ে অজ্ঞাতসকলক অসমীয়া পৰম্পৰাগত ৰন্ধনৰ সৈতে চিনাকি কৰি দিয়াৰ প্ৰয়াস কৰিম আৰু যিসকলে অসমীয়া খাদ্য-সম্ভাৰৰ সৈতে ওৱাকবিহাল সেইসকলকো এবাৰ মনত পেলাই দিয়াৰ যত্ন কৰিম৷ আমাৰ উঠি অহা প্ৰজন্মক আমাৰ থলুৱা খাদ্য সম্ভাৰসমূহৰ লগত পৰিচয় কৰি দিয়া তথা ক্ৰমাৎ অচিনাকি হ’ব ধৰা অলেখ অসমীয়া খাদ্যৰ ৰন্ধন প্ৰণালীক ইউটিউবৰ পৃষ্ঠাত সংৰক্ষণৰ বাবে মোৰ এক ক্ষুদ্ৰ প্ৰয়াস বুলিও ক’ব পাৰে৷ অসমীয়া খাদ্যৰ এক সুকীয়া পৰিচয় আছে৷ কম তেল আৰু কম মা-মছলা তথা স্বাস্থ্যবৰ্ধক ঔষধি শাক পাতেৰে ৰন্ধা আমাৰ থলুৱা প্ৰতিখন ব্যঞ্জনৰে এক সুকীয়া জুতি আৰু উপকাৰিতা আছে৷ পিতিকাৰ পৰা, মাছ-মাংস, খাৰ-টেঙাৰে ৰন্ধা আমাৰ প্ৰতিখন ব্যঞ্জনৰে এক নিজস্ব বৈশিষ্ট্য আছে৷ এই চেনেলটোৰ জৰিয়তে অসমীয়া খাদ্য-সম্ভাৰক বিশুদ্ধ ৰূপত উপস্থাপন কৰাৰ যত্ন কৰিম৷ অৱশ্যে তাতো মোৰ নিজা কিছু সংযোজন থাকিব৷ অসমীয়া পৰম্পৰাগত ৰন্ধন প্ৰকৰণক সংৰক্ষণ তথা প্ৰচাৰ দিয়াৰ এই সামূহিক দায়িত্বক আমি সকলোৱে কান্ধ পাতি লওঁ আহকচোন৷ আশা কৰিছোঁ, মোৰ এই দুয়োটা চেনেলকে আদৰি ল’ব তথা আশীৰ্বাদ কৰিব৷